يحكي أن.. "جيه يكحلها عماها" و"آه ما هي كوسة"

 

جيه يكحلها عماها

 كتبت - دعاء ياسين

لسه سلسلة يحكي أن مكملة معانا ولسه حواديت الأمثلة الشعبية وأصلها منتهتش، المرة اللي فاتت ناقشنا مثلين وعرفنا أصل حكايتهم ايه، النهاردة كمان هنشوف مثلين جداد وهنعرف الحدوتة ورا كل مثل، يلا بينا....

 

"آه ما هي كوسة"

بنسمع العبارة دي كتير اوي لما يكون في اختلاف في المعاملة في نفس الموقف، يعني مثلا لما يكون شاب ابن حد مهم وشاب تاني من عائلة بسيطة ومقدمين على نفس الوظيفة فالشاب اللي أبوه ليه شنه ورنة هو اللي ياخد الوظيفة حتى لو ميستحهاش، طب ليه بقى المثل بتاعنا بيقول كوسة ليه مثلا مش جزرة، خيار، طماطم، اشمعنا كوسة بالذات، يحكي أن كان في زمن المماليك البوابات بتاعة المدينة كانت بتتقفل بالليل ومكنش حد من التجار يقدر يدخل وكانوا بيطروا يستنوا للصبح عشان يدخلوا بضاعتهم ويتجاروا إلا الكوسة وده لأنها كانت بتبوظ بسرعة وفي يوم حد من التجار قال بصوت عالي " اه ما هي كوسة".

 

"جيه يكحلها عماها"

المثل ده بيتقال على الشخص اللي بيحاول يصلح بين شخصين وبدل الأمور ما تتصلح بتتعقد أكتر، يحكي أن كان في واحد بيشك في مراته أنها بتخونه وده عشان مكنتش بتكلمه فقام راح لعرافة عشان تقوله يعمل ايه فقالتله جيب ثعبان ولفه على رقبتك واعمل ميت ومن رد فعلها هتعرف إذا كانت بتحبك ولا لا، وفعلا الرجل عمل بنصيحة العرافة وعمل ميت والثعبان لفه حولين رقبته والست لما شافت جوزها فضلت تصوت وتعيط وتصرخ فعرف الراجل أنها بتحبه وقام حضنها لكن مراته صممت تتطلق بسسب اللي عمله ومن هنا جيه مثل " جيه يكحلها عماها".

 

وهنا نكون خلصنا حلقة النهاردة وأتمني يكونوا عجبوكم ومتنسوش تتبعونا عشان تعرفوا قصص وحواديت مشوقة أكتر، وفي لقاء أخر لسلسة يحكي أن...