يحكى أن.. "اللي اختشوا ماتوا ورجعت حليمة لعادتها القديمة"

 

رجعت حليمة لعادتها القديمة

كتبت - دعاء ياسين

كتير جدا بنسمع أمثال متداولة في حياتنا وبنستخدمها كتير في مختلف المواقف إلا أن أغلبنا مش عارف أصل الأمثلة دي، ايوه لكل الأمثال اللي بنسمعها حدوتة هي اللي جابت الأمثلة دي اللي بنقولها لحد القرن 21، النهاردة موضوعنا خفيف جدا عن شوية أمثلة بسيطة، هتعرف منها قصص مشوقة يمكن تكون مسمعتهاش قبل كده، فيلا بينا نبتدي حوداتنا.

أول مثل: "اللي أختشوا ماتوا

المثل ده شائع جدا في مجتمعنا وبيتقال لما يكون حد بيعمل غلط ومش بيهمه حد خالص والناس تقوم علطول قايلة " اللي اختشوا ماتوا"، طب المثل ده ايه حكايته، يحكى أن زمان في وقت معين كان في حمامات عامة وكانت متقسمة جزء للسيدات وقسم تاني للرجاله، وفي يوم من الأيام قامت حريقة هناك، والنتيجة أن في سيدات ورجالة خرجوا من غير هدومهم خالص عشان ينقذوا نفسهم من الحريقة، وعلى النقيض في سيدات ورجالة اتكسفوا يخرجوا من غير ملابسهم وماتوا هناك واتحرقوا عشان ميخرجوش بره بالشكل ده ومن هنا جيه مثل " اللي اختشوا ماتوا".

 

ثاني مثل: "رجعت حليمة لعادتها القديمة"

المثل ده بنستخدمه كتير لما يكون في حد عنده عادة سيئة ويبطلها بس يرجعلها تاني، طب أيه أصل القصة دي؟ يحكى أن كان في واحدة أسمها حليمة وكانت بخيلة جدا وسبحان الله كان جوزها عكسها تماما وكان راجل كريم وسخي جدا، كل لما تيجي تطبخ كانت بتستخسر تحط سمنة في الأكل، فجوزها قرر أن يعلمها الكرم فقالها " أنتي عارفة أن الناس زمان كانوا بيقولوا أن الست لما تحط معلقة سمنة في الأكل ربنا بيزود عمرها يوم"، وفعلا أتأثرت حليمة بالكلام ده جدا وفعلا أبتدت تزود ملاعق السمن في طبخها، بس جيه يوم والموت خطف منها أبنها الوحيد اللي كانت بتحبه جدا واتمنت الموت، فرجعت تاني تقلل من ملاعق السمن عشان ربنا يقلل من عمرها، ومن هنا الناس قالت" رجعت حليمة لعادتها القديمة".

وبكده نكون خلصنا حواديت النهاردة، مش المثلين دول بس اللي ليهم قصص ، في قصص كتير جدا لها حواديت مشوقة وممتعة، فتابعونا في سلسلة " يحكى أن....."