بسنت ترسم طريقها نحو النجاح

 كتب - عبد الرحمن محيي

يتواجد النجاح مع العزيمة والإصرار والمثابرة، الفشل بداية كل نجاح والأهم من النجاح هو التطوير والحفاظ علي مستواك في موهبتك ، وكما قال أحدهم : (بنواجه الفشل بإيمان واليأس بعزيمة) وهنا تكمن شخصية الناجح، اذ باءت محاولاته الأولي بالفشل ألا يستسلم ويجاول وينهض مجددًا لرسم طريقه نحو المجد.

النجاح وليد الفشل 

"أنا اسمي بسنت السيد، عندي ٢٣ سنة، في الفرقة الرابعة كلية تربية نوعية قسم فني، من مدينة دسوق. بدايتي لما كنت في ابتدائي لما كنت بقلد رسم الكارتون واي شخصية كرتونية كنت بقعد اجيب صور لشخصيات ديزني و اقلدها كنت الاول برسم ك خطوط لفترة طويلة اوي كان الرسم عبارة عن خطوط بس وبعدها بدأت اظلل واحدة واحدة لحد ما اتعلمت التظليل وبعدها بدأت ارسم طبيعة صامتة أو دوائر واعملها ظل ونور أو اكون اي تكوين عندي وابدأ ارسمه واراعي ف التظليل الظل والنور برضو لأن دا اهم حاجة بعد ظبط النسب طبعًا. لقيتني موهوبة في الرسم وحبيته وحبيت اطور من نفسي ف كنت بقعد اجيب صور واقلدها ومع التدريب الكتير بدأت اظبط رسمي نوعًا ما وبعدها قررت ابدا ف رسم الأشخاص لأن كان عندي خوف كبير اني مش هعرف ارسم بني ادم بس مع المحاولات الكتير اللي كنت بجربها ف صحابي بدأت تظبط معايا، اه كنت ف الاول بضيع الملامح خالص وكنت بشوههم وكنت بلاقي نقد كتير اوي اوي اوي وتريقه وم التريقه دي بدأ مستوايا يتحسن اكتر من الاول بكتير وبدأت اظبط النسب واطلع الرسمه نفس الشبهه م الأصل وكنت بجرب كتير لحد متظبط كنت بقعد اتدرب مع نفسي م غير م اسمع اي فيديوهات ع اليوتيوب او اخد كورسات مع حد حبيت اني اوصل لمستوي عالي بنفسي من غير مساعدة م اي حد وبتدرب اكتر لحد م اوصل للمستوي اللي عاوزاه طول م بتدرب اكتر لكل م الاقي مستوايا يتحسن اكتر، اهلي دعموني خصوصا والدتي كانت بتدعمني اوي سواء بالدعم المعنوي أو المادي وكانت معايا ف كل حاجه وحقيقي بشكرها من كل قلبي وبعض من صحابي برضو كانوا بيدعموني ويشجعوني اكمل وكان عندهم ايمان اوي بيا اني هاجي ف يوم وابقي فنانة معروفة وبتمني دا من كل قلبي طبعا. كنت برسم الاول رصاص بس بقلم سنون وبعد كدا بدأت استخدم درجات زي 2B/4B وبعدها بدأت فحم والوان خشب والوان مايه وبعدها زيت واي خامة ممكن اشتغل بيها عادي سواء الرسم دا على ورق أو قماش وبشتغل قشرة ع خشب وبشتغل حرق ع جلد واي حاجه ممكن اتعامل معاها عادي وبكل سهولة".

شغفي لن ينتهي إلى أن أصبح فنانة مشهورة 

الرسم داا كل حياتي حرفيا الحاجة الوحيده اللي بلجأ لها في كل الاوقات سواء مبسوطه أو حزينه وبطلع فيه كل طاقتي واكتر حاجه بحبها بجد الرسم داا صديقي المخلص الوحيد. اتمني اني اوصل لمستوي عالمي وابقي فنانة كبيرة ويكون ليا مرسمي الخاص بياا ومعارض خاصة وحاجات كتير اوي بجد وإن شاء الله هتتحقق بس ف وقتها.

نصيحة للشباب من بسنت 

"الأهم من تحقيق النجاح إن الإنسان يسعي ورا حلمه ويفضل يشتغل ويتعب ع نفسه ويتدرب كتير لحد م يوصل لمستوي تاني ويفضل بتعلم لحد ما يوصل لمستوي الإحتراف وهكذا وإن طول ما احنا عايشين هنفضل نتعلم حتي لو وقعنا هنعرف نقوم اقوى م الاول وان ميستسلمش ويحبطهم كلام حد طول مهو مؤمن بنفسه هيوصل لكل اللي هو عاوزه".

في النهاية أتمنى لبسنت أن تحقق ما تريده بالمثابرة ومواصلة تحسين مستواها . يراودني في ذلك مقولة (علي الإنسان السعي وليس عليه ادراك النجاح). سيأتي عليك مدة تشعر بها أنك هزيل ضعيف يجب أن تتخطى هذه الفترة وحدك ولا تنتظر مساعدة أحد. حاول أن تصبح بسنت تجارب فشلها بيدها. نتمني في المرة القادمة أن نزور المرسم الخاص ببسنت وأن نرى لوحاتها ورسوماتها في كل مكان.