زوجي كلما اسامحه يخونني وهكذا انتقمت منه.. اشعر بالذنب ساعدني

 

صاحبة المشكلة تقول..

انا تزوجت صالونات شخص مسافر دولة اجنبية وفترة الخطوبة كلها كان مسافر وكنت شاكة ان له علاقات نسائية كلام فقط المقصد ..وكان كل اللي حواليا يكذبني ويقولي مكنش خطب من بلده لو هو كده وبعد سنة ونص اتجوزنا وبعد حوالي ٣ ايام بمسك فونه لقيته بيتكلم مع البنات.

وكان بيتكلم عليا انه متجوزني كدا وخلاص مش حب ولا شي وواجهته وعملت مشكلة ووعدني ووعد والدتي انه مش هيكلم بنات تاني وبعد شهر سافر ولكن تصرفاته كانت غريبة والاقيه فاتح بالساعات ومش بيرد عليا ومتأخر بالليل ويكدب ويقولي مش بعمل حاجة.

صممت انه اسافر له وفعلا سافرت وهناك اكتشفت انه بيكلم واحدة ومصاحبها وبيخرج معاها ولقيت صورها وفيديوهات ليها ع فونه وعملت مشكلة كبيرة وطلبت اني ارجع بلدي وبلغت والدته ووعدني انه هيمسح كل شئ ويعمل ليها بلوك وفعلا عمل كدا ولكن كان مجرد ما ينزل من الشقة يشيل البلوك ويكلمها ويرجعه تاني أو يكلمها ويمسح سجل المكالمة.

والمشاكل زادت وانا تعبت نفسيا ووعدني كذا مرة انها مجرد زميلة وصممت اتعرف عليها واشوفها لقيتها واحدة متبرجة ولبسها شبيه بالغرب معندهاش حياء والاسم فقط انها مسلمة.. طلبت انه يقطع علاقته بها وحلفته ع المصحف انه ما يكلمها تاني لو عرفت حاجة تاني هطلع واحكي لوالدي ووالده ورجعت بلدي.

ويشاء القدر انها تتفصل من الجامعة لرسوبها ف المواد طبعا فرحت ولكن هو سأل عنها ولما عرف انها اتفصلت شال البلوك وكلمها واتكلمت مع واحدة صاحبتي وقالتلي ابعتيلها وقوليلها ابعدي عن جوزي ولو كان فعلا عايزاك كان اتجوزك وايه علاقتك براجل متجوز.

وبعتلها ولكنها جابت رقم جديد وبعتت لزوجي الرسالة وشتمته وهزقته وقالتله مراتك فيها وفيها ..وانت مش راجل وانا مش راضية ابعت لمراتك أدلة انك كنت ترن عليا وتبعتلي وانك كنت تقول انك بتكرهاها وانا اللي كنت بلطف الجو بينكم.

وهو كلمني وقعد يزعق فيا ازاي ابعتلها وشوفت كل شتيمتها بعيني ع فونه وبعتتلي انا كلام جارح ولمي جوزك وانا مش راضية ابعتلك حاجات هتخرب بيتك وانا ساكتة لغاية دلوقتي وخلت واحدة تكلمني تقولي جوزك بتاع نسوان واحنا ممكن نفضحه ع الفيس بوك.

هو وعدني مش هيكلم حد تاني وبعد مرور سنة لقيتها منزله فيديو بتقول انها راجعة البلد الأجنبية تاني انا حسيت بنار جوايا وحسيت انه هيرجع يكلمها ولقيت تصرفاته غريبة معايا ف بعت للوزارة انه منحته خلصت واتفصل من الجامعة وانه دخل البلد بمنحه جديدة.

من يومها وانا بعيط وحاسة اني اذيته ومعرفش هيعملوا معاه ايه ومش عارفه ازاي انا اعمل كدا بس ده مكنش بأيدي ده وسوسه الشيطان ليا والغيرة وخايفة يتأذي اعمل ايه 😥

الرد على صاحبة المشكلة:

اريد ان اعرف منذ متى وانتوا متزوجين وهل بينكم أولاد هذا سؤال في غاية الأهمية..

خاصة وان زوجك طبعه الخيانة ورغم وعوده معكِ ورغم انه "حلف" بالله والمصحف في أكثر من مرة، لكنه يعود ولا يتعظ والغريب انه طالما يحبها لما لا يتزوجها وتزوجك انتي..

 يبدو انك شخص محترم ويقدس الحياة الزوجية وبشدة وتريدي الحفاظ على بيتك بشتى الطرق، وحاولتي بكل الطرق الممكنة ان تمنعي زوجك من ان يهد عش الزوجية بينكما..

 لكن وفقًا لما ذكرتيه يبدو ان زوجك لم يتعظ ولم يتعلم وهو ما زاد من غيرتك أكثر، وزاد من رغبتك في ان تنتقمي بشكل لا إرادي ودون أي تحكم منك في انفعالاتك، رغم ان الذي يحب لا ينتقم..

 وارى بأن هذا هو خطأك الوحيد لكن خطأك رد فعل على أفعال كثيرة مر بها زوجك، لان ما فعلتيه لن يضره هو فحسب بل سيضرك ايضًا، والاكثر بأن الشخص الذي يخون زوجته سيخونها وحتى ولو كان في غرفة نومها!! مع الأسف..
هناك طريقين لا ثالث لهما يا عزيزتي..

 ان تواصلي محاولاتك في ان تغيريه وتتحملي ما يفعله معكِ لأجل عش الزوجية، وتحتسبي صبرك وتحملك عند الله فالله سيرزقك على ذلك خير الثواب إن كانت لديك المقدرة في ذلك بالطبع..

 الحل الآخر قبل ان تتخذي قرار الانفصال النهائي انفصلي عنه ولو انفصال مؤقت كتهديد وغيبي عنه فترة طويلة لكي يشعر بحجم ما فعله تجاهك ويندم اشد الندم، وإذا كرر فعلته بعد ذلك لا يوجد سوى أن تنفصلي بشكل نهائي او تتحمليه على طبعه..

فكري جيدًا في الحل الأنسب لكِ ولحياتك..اتمني لكِ كل خير