دايما تسمع جملة "البلد مفيهاش بطالة، احنا مش بنعاني من قله الوظائف لكن بنعاني من قله
الكفاءة والخبرة" تختلف او تتفق هي دي الحقيقة، الشاب بيخلص جامعته وينتظر الوظيفة
اللي ملهاش مثيل والمرتب اللي محصلش عاوز يكون وزير في بداية حياته يشوف المرتبات
ويفاضل بينهم بس مؤهلاته ايه ولا حاجة.
بس مش كل الشباب
بتفكر كده واوقات كتير بتكون المشكلة عند اللي بيعلنوا عن الوظايف، زي انهم يطلبوا
حديث التخرج ومعاه خمس سنين خبره في المجال ويتقدم الشاب للانترفيو وتبدأ الأسئلة
معاك كم كورس؟ تقدر تشتغل 12ساعة ولا لا؟
وهنا يبدأ الشاب يكتشف المشكلة انا مخدتش كورسات فيبدأ يجتهد ويدور وياخد
كورس والتاني والتالت ويتقدم للوظيفة تاني ويكتشف انه ناقص له كورسات تاني ويدخل
في دوامه ملهاش نهاية لان الموضوع ظاهريا حلو زي كيف تتعلم الفرنسيه في خمس ايام !
كلام حماسي وبس , 80% منه مجرد ربح.
طيب لما محتوي الكورسات مهم اوي ليه مش متوفر في الجامعة يعني تخلص 4 او 5 سنين وتكتشف إنك مش هتعرف
تشتغل الا بالكورسات.
وانا شخصيا مش ضد التطوير للذات او للمهارات ولاكن
انا ضد التضليل وضد الاماكن اللي بتستغل الشباب باسم التنمية والتطوير وكل اللي
بيعملوا استثمار وبس.
كلنا بنشجع انك تكون مؤهل كويس معاك لغات وبتقدر
تدير وقتك، لكن أنت متضطر تتفادي عمليات النصب باسم الكورسات.
وده اللي بيخلينا نقابل شباب اللي معاه بكالوريوس
هندسه او تجاره وبيشتغل في فنادق او في حضانة او في اي مجال خارج دراسته مثلا عشان
مش لاقي شغل.
الغريب اننا بنتعامل مع الموضوع وكأنه مشكله قوه
الشباب كبيره وعددهم ضخم مقارنا بعدد الوظايف المتاحة والمفروض اننا نفرح بكم
الشباب المتعلمين دول اللي ممكن يغيروا وجه بلد لوحدهم.
الشباب اللي بتبني وبتعمر الشباب اللي تقدر تقوم
بلد وتقدر بردو تضعيها، مش نقعد نشتتهم ونضيع مستقبلهم بين استغلال اصحاب الكورسات
وبين المرتبات المتدنية.
اعتقد اننا برضة بنعاني من البطالة المقنعة، ودي بقي بتشكل نسبة كبيرة من الموظفين، بيروح الشغل اه بس بيفضل قاعد مش بيشوف شغله وبيستغل الناس ويوقف حالهم وبس، يعني حتي اللي ليهم وظيفة مش بيأدوا عملهم بشكل مظبوط. للأسف صعب تلاقي حد بيعمل شغله باتقان وبحب، كلها تقضية وقت، وباقي الشباب اللي كله حماس قاعد علي ما تفرج ونرجع نسأل نفسنا هو إحنا اتأخرنا ليه؟