في الفترة الأخيرة كان فيه صراع بين المجتمع
الذكوري والفيمنست، وخناقات للمطالبة بالمساواة واللي قادرة على التحدي ومنقدرش
ننسى دور الكوميكس طبعا، لحد هنا والموضوع يبان عادي.
اللي مش عادي ان الموضوع وصل للقتل بين
الزوجين، والأكتر صراحة هو حوادث قتل الزوجة لزوجها، وبدل ما كنا بنقول استهدوا
بالله الموضوع مش مستاهل خناقة بقينا نقول الموضوع مش مستاهل قتل!
حوادث القتل الكتير دي مستحيل نتخطاها من غير
ما نسأل على سبب المشكلة ونشوف ايه اللي وصلنا للمرحلة دي.
في الحقيقة انا فضلت ادور على سبب المشكلة بس
لقيتهم مجموعة مشاكل مرتبطين ببعض وكل ده من وجهه نظري اللي تكاد تكون صحيحة أو
خاطئة.
الزواج التقليدي
وهنا أنا مش قصدي جواز الصالونات، أنا أقصد
بالزواج التقليدي انه شاب يعجب ببنت وتنشأ بينهم قصة حب عميقة ويتقدم لها ويترفض
ويدخل في صراع مع أهلها لغايه ما يوافقوا وخلاص كده وده صح مفيش حاجة.
الغلط بقى اننا نتجاهل فتره الخطوبة اللي
المفروض نتعرف بيها على شخصيات بعض ونقرر إذا كنا هنكمل ولا كل واحد يروح لحاله،
لكن اللي بيحصل اننا بنضيع فتره الخطوبة ونتلخم في التجهيز و العفش و العزومات و الخروجات
وبس ونجي بعد الزواج نكتشف أننا مننفعش لبعض، لا مش هنطلق لكن هنقتل بعض والجدع
اللى يعيش في الاخر.
هو ايه مفهوم الزواج اصلا!
قبل ما تقدم على خطوة الزواج اعرف الاول ايه
هو الزواج لأننا نسينا انه رباط مقدس، ربنا بيباركلنا في العلاقة دي اللي أساسها
المودة والرحمة.
مطلوب منك تفهم الاول شريك حياتك واعرف تتعامل
معاه ازاي عشان تعرفوا تعيشوا سوا.
اتعلم واقرأ عن تربية الاطفال حتي لو مش عندك
اطفال بس هيجي يوم وتكون مسؤول عن طفل ومسؤول عن تربيته.
طيب هي المشكلة في السن
في الواقع لا
المشكلة مش في السن، في ناس كتيرة في سن صغير وناضجة جدا وناس سنها كبير وعقلها
فاضي فبلاش نهتم بالسن وننسي المشكلة الأساسية.
طيب دي المشاكل هل فيه حل؟
كل مشكلة وليها حل، ومن وجهة نظري أن الحل هو
اننا نعمل رخصة للزواج الرخصة دي من غيرها مش هتقدر تتزوج لأنها بتثبت إنك اتعلمت
واخدت دورات عن الزواج وتربية الأطفال وبكده نكون حلينا نصف المشكلة.
لان النصف التاني يعتمد على تربية الاهل لو
علموه انه يحترم المرأه ويقدرها هيكبر يحترم زوجته والبنت لو اتربت على ان امها
بتحترم ابوها هتكبر تحترم زوجها،
أي مشكله تواجهك دور على اساسها هتكتشف ان العيب في التربية.
تخيلوا ان في حاجه اسمها طلاق!
طيب بعد ما
اخترت صح وتزوجت وكل حاجة، بقيت مش طايق شريك حياتي اقتلوه! لا لا في حاجة اسمها
طلاق لو مفيش اتفاق بينا عادي، فشلنا عادي، نطلق مش نقتل بعض مش مستاهلة خناقة يا جماعة
اقصد مش مستاهلة قتل!