كتبت – ابتهال محمد
"على فكرة ده مجنون، لا انا مستحيل اروح لدكتور نفساني الناس تقول
عليا ايه، هو فيه حاجة اسمها علاج نفسي يا راجل، انا طبيعي يا جماعة مفيش فيا أي
حاجة، بص أكيد أنت مسحور، ما انت ممكن كمان تكون ملبوس أو معمولك عمل".. كل
دي خرافات كتير بنسمعها أول لما تيجي سيرة العلاج النفسي وعلى طول تلاقي ناس كتيرة
تهرب منها، لا وفيه بعض الناس بتروح لدكتور نفساني في الخفاء وكأنها بتعمل جريمة
مثلاً..
تعرفوا أنه في سنة 2018 اجرت وزارة الصحة مسح قومي للصحة النفسية واللي أكد
ان 25% من المصريين مصابين باضطرابات نفسية، وان نسبة النساء اكتر من الرجال.
وعلي الرغم من النسبة الكبيرة دي الا ان ناس كتير جدا في المجتمع جاهلة
بحقيقة المرض النفسي، وازاي نتعامل معاه ودا طبعا بسبب الخرافات اللي ناس كتير
مصدقينها، ومن الخرافات دي
1- ان المرضي النفسيين مجانين
ودا طبعا شيء ملوش اي اساس من الصحة، لان المرضي النفسيين ناس طبيعية زينا
وبالعكس ممكن يكونوا في جوانب تانيه افضل مننا، ولكن حصلهم مواقف اثرت في سلوكهم
وحياتهم أدت للمرض النفسي دا، والتاريخ ذكر مشاهير كتير كانوا مصابين باضطرابات
نفسية ومنهم الفنان العالمي بيتهوڤن اللي كان عنده اكتئاب ورغبة دايما في الوحدة،
والعالم الكبير اسحاق نيوتن اللي صُنف انه افضل شخصية بعد النبي محمد عليه افضل
الصلاة والسلام، وصُنف كمان انه من افضل العقول البشرية في العالم، ودا من اهم
الاثبتات ان ممكن الشخص المصاب بمرض نفسي يكون افضل واهم من الشخص السليم نفسيا.
2- ان المريض النفسي محسود
المرض النفسي له اسباب كتير جدا ولكن الحسد مش منها، فالمرض النفسي بيحصل
بسبب احداث بتحصلنا في حياتنا بتأثر على سلوكنا وتصرفاتنا.
3- المرض النفسي سببه بُعد عن الله
المرض النفسي مش مشاعر سلبية وهلاوس وبس لا دا خلل في هرمونات الجسم
واضطراب في وظائف بعض مراكز المخ هي اللي بتسبب الاعراض دي، وبيتم العلاج بالدواء
زيه زي المرض الجسدي بالظبط، فهو بيصيب الشخص بغض النظر عن قوة ايمانه او ضعفه،
وطبيعة الانسان انه بيمرض عادي جدا والا بقا يبقي ملاك مش بشر.
4- ان المرض النفسي يحدث للبالغين فقط
اُثبت ان العلامات الاولي لاضطرابات الصحة النفسية تظهر قبل بلوغ 14 سنة،
وتبدأ معظم الاضطرابات النفسية قبل سن 24، ودا بيكون ناتج لعوامل بيولوجية ونفسية
واجتماعية بتحصلهم، ولكن للاسف 20% بس اللي بيحصلوا على العلاج.
5- السبب في المرض النفسي للطفل هم الوالدين
القاء اللوم على الوالدين فقط غلط جدا، في عوامل كتير ممكن تأثر على صحة
الطفل النفسية وبتكون خارج سيطرة الاهل زي الوراثة والعوامل البيولوجية، وكمان
البيئة المحيطة بيه.
6- خطورة ووحشية العلاج بالصدمات الكهربائية
العلاج بالصدمات الكهربائية نوع من انواع العلاج الفعال زيه زي اي علاج، ومستحيل
انه يتم من غير موافقة المريض، والمريض وقتها بيكون تحت تأثير التخدير يعني مش
بيحس بيها.
واخيرا وعلى الرغم من التطور الكبير اللي بتعيشه المجتمعات في الوقت
الحالي، الا ان الخرافات دي لسه ناس كتير مصدقاها، وبتتعامل مع المريض النفسي انه
مختل عقليا وانه لازم يتعزل وكأنه وصمة عار مينفعش يبقي بيننا، وللاسف دا سبب كبير
في تأخر المريض عن العلاج او رفضه من الاساس، ودا اللي سبب ان الاضطرابات النفسية
من أكبر اسباب الانتحار اللي نسبته وصلت ل 900 ألف شخص سنوياً.
الخلاصة: ان المجتمع مش هيتغير كله مرة واحدة، التغير اللي بجد هيحصل لما
كل واحد فينا يبدأ بنفسه وباللي حواليه ويحاول ينشر الوعي ان الاكتئاب او الوسواس
او الهلاوس او غيرهم من الامراض النفسية زيهم زي السكر و الضغط وزي اي مرض عضوي
محتاج علاج و اهتمامش