تتمثل بعض الأهداف التى نسعى لتحقيقها على هيئة موهبة يمتلكها البعض ويرغبوا فى تنميتها للحصول على الحلم المراد تحقيقه، كثيرا ما تغمرني السعادة عندما أجد أشخاص مَنَّ الله عليهم بالعديد من المواهب؛ فى الوقت هذا ما يدور فى ذهني أنه كيف لشخص أن يمتلك أكثر من موهبة ويتألق فى اكثر من مجال؟! الاجابه الوحيدة لتلك السؤال هى أن قدرة الله تفوق كل شئ، وامتلاكهم للموهبة ليس شرط لتميزهم؛ ولكن كل ماهم عليه الآن هو جزء بسيط من جدهم واجتهادهم وإصرارهم على صُنع ذاتهم بأى طريقة ممكنه.
دعونا نتعرف على موهبة اليوم :
مروة طه طالبة فى فنون تطبيقية، موهوبة متميزة تمتلك عدة مواهب منها موهبة الرسم، الهاند ميد "خرز، حلي"، تفصيل الملابس، شغل الجلد الطبيعي، استطاعت أن تطور من ذاتها وحققت نجاح كبير فى جميع المجالات، تميزت فى جوانب كثيره من الفن.
الجانب الاول :
قالت :" اول موهبة اكتشفتها هى الرسم، كنت بحب الرسم من وأنا طفلة صغيرة، تقريبا وأنا فى عمر ٤ سنين، كنت بحب اتفرج على الصور والألوان وأشوف مجلات ميكي وغيرها وأحاول ارسم زيهم، وبدأت اتطور اكتر فى عمر ٩ سنين، كنت برسم الانمي واتطورت فيه بطريقة سريعة واستمريت فيه فى مرحلة إعدادي، لدرجة أنه كان كل ال بيشوفوه يفتكروني كنت بَشِفه مش ارسمه، وكنت برسم جنب الدراسه ومتفوقة فى دراستي "
وأضافت :" بدأت اتعلم الطبيعة الصامتة والبورتريه واخدت كورسات لرسم البورتريه واتعلمته بالرصاص وبدأت اتعلم مع نفسي بورتريه الألوان واجرب كتير ، اما التطور الملحوظ كان بدايه تالته ثانوي اتعلمت الرسم بالفحم، واكتفيت بالرسم فقط وتركت هواياتي التانيه فى الفتره دى وده بسبب الدراسه وخوف أهلي خصوصا ان أنا كنت دفعة التابلت فكان الخوف مضاعف "
الجانب الثانى :
قالت :" اشتغلت فى مجال الهاند ميد من تالته إعدادي، وبعد انتهاء المرحلة الاعدادية اتعلمت الخرز ومارست المجال دا وحولته لمهنه، كنت ببيع لقرايبي في البدايه، وبعدها بعت للعملاء من خلال جروب الفيس بوك ال كنت بعرض عليه شغلي "
الجانب الثالث :
واصلت :" بدأ اهتمامي بالحلي يظهر واتعلمته لوحدي لأني كنت بحب المجال وبقيت معروفه فى المكان ال انا فيه بالاكسسورات ال كنت بنفذها وكان بيعجبهم الحس الفني في شغلي "
الجانب الرابع :
قالت :" اتعلمت تفصيل الملابس وشغل الجلد الطبيعي فى أولى وتانيه ثانوي، ودايما معارض المدرسه والادارة بتكون فيها رسوماتي واكسسواراتي وشغل الجلد الطبيعي، لدرجة إن مستشار التربيه والتعليم أشاد بشغلي وكان يقولي هتكوني حاجه كبيره فى المستقبل"
تحول من حلم إلي واقع :
قالت مروة :" انا كنت بحلم بكليه فنون تطبيقية وبفضل الله دخلتها وبدأت اتطور اكتر واتعلمت خامة الباستل، ونميت موهبتي ووصلت لمستوى كويس فى مجالي "
وأضافت :" فى البدايه كان صعب اوفق بين دراستي والموهبة، ولكن كنت بحب موهبتي وبحاول عشانها وفى نفس الوقت متميزة فى الدراسة، وأهلي واصحابي بيدعموني جدا ودايما بيشجعوني فى أي خطوة واي مجال بتعلمه، وده سبب بيخليني استمر وانمي هوايتي "
المجال المفضل بالنسبة لمروة :
واصلت:" على الرغم من أن الرسم مجالاته كتير بس أنا بحب مجال كليتي و هو أنه نطبق الفن علي أرض الواقع من خلال منتج علشان ننشر الجمال حوالينا فبيبقي اي شيء بنشوفه أو نتعامل معاه جميل و قائم علي أسس صح "
فى النهايه بعض انجازات المبدعة مروة طه :
1- تم تكريمها من السفير الهندي لحصولها على المركز الرابع على مستوى المدارس الاعدادية فى القاهرة فى مسابقة لمحات من الهند التابعة للسفارة الهندية.
2- اشتركت فى معرضين تابعين لكلية الفنون التطبيقيه ونالت إعجاب معظم دكاترة الكليه.
3- اشتركت فى معرض عزيزي ثيو عن الفنان فينست فان جوخ.
- الجدير بالذكر تأسيسها جروب على الفيسبوك بوك باسم Marwa for handmade لتعرض أعمالها فى الحلى والخرز والجلد الطبيعي.
إرسال تعليق