التفاؤل دافع أساسي لأجل تحقيق الأهداف، فهو خطوة جيدة ووسيلة تعطيك الأمل والثقة فى الوصول رغم الأزمات، كما أنه عنصر هام من عناصر النجاح؛ فهو يساعدك على تحقيق ما تريد وإنجاز الأشياء بكل اهتمام رغبةً فى التميز، وهذا ما تمسكت به موهوبتنا حتى تحدت الظروف وتيقنت من النجاح.
نبذة عن الموهبة :
صابره جمعة سيد الجيزي، من الفنانين الموهوبين بمحافظة القاهرة، تمتلك من العمر 20 عاما، بدأ حبها للرسم يظهر منذ الصغر ومن هنا كانت بدايه اكتشافها لهوايه الرسم.
بدايتها مع الفن :
قالت :" انا كنت برسم مواضيع المدرسه بطرق مختلفة ودايما ببق مميزة، واخدت لقب فنانة الفصل ونا فى ابتدائي ، ومن وقتها ونا بنمي موهبتي وبرسم دايما، ومع العلم انا اعتمدت ع نفسي وطورت من نفسي كتير بمجهودي وما اخدتش كورسات"
وأضافت :" انا حاليا داخله أولى جامعه، وبفضل الله بوفق بين دراستي ورسمي، واغلب وقت برسم فيه هو الاجازه، وبشغل وقت فراغي بالرسم "
مشاركات الرسم :
واصلت صابرة :" كنت بشارك فى مسابقات كتير فى المدرسه، وقدرت اثبت تميزي واختلافي فى مواضيع الرسم، ولما كبرت دخلت مسابقات كتير فى كيانات مختلفة ومسابقات الكترونيه ومحليه، وحصلت على المركز الأول اكثر من مرة، واخدت المركز الخامس، وقريب جدا عندي حفلة تكريم بالرابع الثقافي تبع كيان حلم بسيط "
الاختيار الأنسب فى اى وقت هو الرسم :
قالت :" انا برسم في كل الأوقات، مش بقدر مرسمش لازم أرسم عشان اتخلص من حزني، انا بلجأ للرسم فى وقت زعلي او فرحي، بهرب من اي حاجه بالرسم ودايما كنت احب اطلع حزني على هيئة لوحة، من أسعد أوقاتي لما اخلص الرسمه، وكان حالي بيتغير للأفضل ونتيجة الرسمه بتديني طاقة ايجابيه"
تحول الآراء من النقد الي الدعم :
قالت :" والدتي دايما مصدر تشجيع ودعم ليا، ودايما فخوره بانجازاتي وبتساعدني اطور من هوايتي على الرغم من أني قابلت صعوبات فى الاول من أهلي كانوا دايما فاكرين ان الرسم تضييع وقت واني كده بضيع وقتي ولكن حاليا تشجيع الناس وارائهم دافع ليا فى تقدمي وتحسين مستوايا، أكبر دافع ليا هما أصحابي وأهلي، وهما اول ناس بيدعموني وارائهم فى الرسم حلوة جدا وبيقولو إني مبدعة وليا مستقبل باهر ودايما بيعطوني أمل اني هوصل لحلمي، وكان سيب تطويري لنفسي إني بحول الانتقادات لطاقه ايجابيه عشان اقدر اثبت تميزي وموهبتي على الكل "
البورتريه أقرب الاتجاهات لقلب موهوبتنا :
قالت :" أنا متنوعة فى الرسم وبحب التغير، وبحب أنواع كتير من الرسم ولكن بميل اكتر لرسم البورتريه "
وأضافت :" انا واجهت صعوبات كتير فى الرسم لكن أصعب رسمة لما بدأت ارسم بالجاف، رسمت رسمه بتدل على الوجع ال جوانا والصرخة كانت صعبه شويه، وكان احساسي دايما اني العيون فن مختلف، هي ال بتتكلم وبتعبر عن الحزن او الفرحة والقلق، والخلاصة إن العيون عنوان الفن، وده سببي اني برسمها اكتر حاجه "
كلمة اخيرة :
قالت :" عاوزة اقول لأي شخص عنده موهبه استمر ومتوقفش، وخليك متأكد ان مهما حصل انت تقدر تعمل نفسك واسمك الخاص، بس خليك قدها واوعي تيأس واتوكل على ربنا وهتوصل صدقني "
طموح المبدعة صابرة جمعة :
1- أن تحول الرسم لمهنه.
2- ان تأسس معرض خاص بها وتبدأ فى تعليم الرسم.
3- تتألق فى مجال الرسم وتطور من ذاتها حتى تحصل على اسم ومكانه خاصه فى عالم الرسم.
إرسال تعليق