عاوز اتعلم إنجليزي

 

 

موظف الأتش آر: للأسف حضرتك متقبلتش في الوظيفة.

عماد: ليه!! ده أنا عندي مؤهلات عالية تناسب الوظيفة.

موظف الأتش آر: أيوه ده حقيقي، لكن في حاجة مهمة جدًا وهي اللغة وللأسف لغة حضرتك مش قوية كفاية عشان تشغل الوظيفة دي، أنا بقترح على حضرتك تاخد قرصات تدربك وتطور من مهارات اللغة عندك بالذات أن أي وظيفة دلوقتي الأنجليزي بقى شيء أساسي فيها.

عماد : تمام، شكرا لحضرتك.

اليوم التاني : عماد بيكلم صاحبه عمر عشان يقوله عمل أيه في الإنترفيو

عماد: أزيك يا عمر، عايز اقولك على اللي حصل معايا في الأنترفيو.

عمر: أزيك يا عماد، طمني أيه الأخبار؟

عماد: للأسف متقبلتش عشان لغتي ضعيفة مع إني أخدت قرص إنجليزي عشان أتأهل بس مفيش فايدة. شكله كان قرص ملوش لازمة، أنا بجد عاوز اتعلم إنجليزي صح، أنت أزاي أتعلمت إنجليزي يا عمر في الفترة القصيرة دي.

عمر: بص يا باشا، أنا هسألك حاجة واحدة بس هو أنت كنت بتمارس اللغة كام ساعة في اليوم؟

عماد: ههههه، قصدك كام ساعة في الأسبوع، ما أنت عارف أن كنت باخد كورس مكثف أربع ساعات في اليوم.

عمر: تمام مفيش مشكلة، طب وباقي الأسبوع مش بتمارس فيه اللغة ليه. حاجة مهمة جدًا لازم تعرفها أن عشان تنمي لغتك لازم تستخدمها يوميا مش أقل من أربع ساعات يومياً لو عايز نتيجة سريعة.

عماد: أربع ساعات يومياً، حيلك حيلك فين الوقت ومين اللي مارس معاه اللغة غير المدرس اللي بيدني في القرص.

عمر: لو على الوقت سهلة وأنت خارج بالعربية أسمع الرايو، هتلاقي قنوات إنجلش كتير وبعدين لازم تخصص لنفسك وقت يكون ثابت عشان تعرف تمارس اللغة وتتطور من نفسك دي حاجة أساسية، وبالنسبة تمارسها مع مين، ممكن تمارسها معايا أو مع أي حد من صحابك اللي بيعرفوا لغة وكمان دلوقتي في برامج بتخلي ناس من دول مختلفة يتجمعوا أون لاين ويتكلموا ويمارسوا اللغة، الأستمرارية وأنك تحيط نفسك بمجتمع يتكلم باللغة دي هي السر يا صديقي.

عماد: أيوه بس أنا بخاف أتكلم مع حد عشان ممكن يكون عندي أخطاء بالذات في النطق.

عمر: وأيه يعني؟! هو أنت أتعلمت عربي أزاي؟ أكيد متولدتش فصيح ولا أيه. لو فضلت خايف من أنك تغلط عمرك ما هتتعلم وهتفضل واقف مكانك . لازم تعرف يا زميلي أن اللي مبيغلطش مبيتعلمش خالص، فشئ طبيعي أنك تغلط عشان تتعلم من غلطك وتتحسن.

عماد: أيوه فعلاً معاك حق، أن اللي بينرفزني أني لما بكتب بكون كويس ومش بعمل أغلاط في الجرامر لكن لما أجي أتكلم دايماً بتلغبط وبتوتر.

عمر: ده طبيعي لأن لما بتكتب بتكون مركز أكتر، ومهم جداً أنك تعرف طريقة ممارسة اللغة. اللغة مش كتابة بس لا. الإنجليزي زي أي لغة لازم فيها أربع مهارات: الاستماع، التحدث، القراءة، والكتابة، لازم تشتغل عليهم كلهم عشان كلهم بيصبوا على بعض. مينفعش تشتغل على واحدة وتسيب الباقي ومينفعش تشتغل على الجرامر بس عشان يبقى الأسم أنك عارف القواعد، على العكس لازم تستنتج القواعد من خلال الأستمتاع والكلام والقراءة وفي نفس الوقت وأنت بتتعلم تتطبقهم، ومهم جداً يكون معاك حد يوجهك ويقيمك عشان تعرف أغلاطك وتصلحها.

عماد: يا سيدي ما أنا دخلت كورس بس مجاش بفايدة أوي.

عمر: هو مجاش بفايدة عشان أنت مكنتش بتواظب في استمرارك تعلم اللغة. ممكن يكون حد زيك دخل معاك بس القرص جاب معاه نتيجة وده ليه أسباب كتيرة، أولها زي ما قولتلك أنك تمارس الإنجليزي بره باب القرص وتسمع كتير وحاجة كمان مهمة هي إصرارك وعزيمتك وحبك للحاجة اللي بتعملها. حتى لو مش بتحب اللغة أوي على فكرة ممكن تتعلم بس لو عندك إستعداد أنك تعمل مجهود أكبر لكن أنك تروح أربع ساعات في الأسبوع وتقول أنا هبقي حريف إنجلش ده صعب جداً، اه صحيح هيبقي في تطوير بس أكيد مش زي حد بيشتغل على نفسه أكتر وبيحاول يعلى من مهاراته بره القرص نفسه.

عماد: يعني الطريقة دي مضمونة.

عمر: أنا أتعلمت إنجليزي كده يا صاحبي، الخلاصة أنك تستمر ومتملش وتهتم بمهارات اللغة مع حد يتابعك هتبقى برفكتو وطبعاً سر الخلطة هي الحب والإصرار.